Édukasyon

Objèktif I – Donner z’étidyan dan l’ékol primair, segondair et universitair, mèt et métrès d’ékol et dirèktèr dé-z’opportunité pou engajer yé dan des progràm de françé.

Progràm Françé Segond Langaj
Immersyon en Françé
KODOFIL Konsorsyum Progràm Immersyon en Françé
KODOFIL Rekrutmen Professèr
KODOFIL Konsorsyum Université et Collèj la Lwizyàn
Progràm Bours et Échanj Internasyonal

Programm Françé Segond Langaj

KODOFIL né en 1968 et dépi temp-ça-là, yé travayé étwatmen avèk Ministèr Édukasyon Léta pou pousser le moun à étidyer le françé endan lé-z’ékol primair et segondair. Pendan dé-z’année lé-z’Amérikain, yé té p’olé le moun parler françé et yé té puni et fwété pou ça. Apé ça ça té fé dé-z’année pou konvaink le moun ke ça yé té fé, té pas bon et ke le moun ki parl françé pas môvé. En 1983 Konséy Skolair Léta té voté pou ekzijer 5 année sékond langaj dan yé z’ékol primair et segondair. Épi pou kalifyer pou programm TOPS, z’étidyan-yé gain pou prònn au mwin dé z’an sékond langaj dan l’ékol sékondair. Dan la Lwizyàn ojordi, y n’a enkò pli di moun ap’étidyé le françé k’avan.

Immersyon en Françé

Pou dòt z’informasyon su l’immersyon en françé en Lwizyàn, visité sit internet à Aksyon Kadjinn.

L’immersyon en françé, c’est kan lé-z’étidyan “immersé” dan langaj françé. Ça veut dire k’un sijé konm les matématik ou étid sosyal, le moun mont ça tout en françé épi l’étidyan, li appren vokabulair-ça avèk so l’oréy et la pratik. Mais ça-là, c’est même manyèr nous-zòt té apprònn nous-zòt premiyé langaj. Icit yé kommens l’immersyon dan Kindergarden. Prèske tou yé klass, c’est en françé, sôf yé klas dé-z’ar en anglé. Épi yé ajout ann nòt année skolair au progràm-ça ékan z’élèv avans chak année. En l’année 2001-2002, 2,200 z’élèv endan 26 z’ékol dan 8 parwaz participé dan progràm immersyon françèz. Dé progràm en plis té kommensé dan la parwaz Ibéry en 2002-2003.

Piti moun sorti progràm-là, yé kapab pou parler françé konm kèkun ki té né avèk ça. Mais yé gain des méyèr grad su yé z’examen stardardizé, konm le LEAP (Progràm Évaluwasyon Édukasyon en Lwizyàn). Fô dir mèrsi à yé paren pou sucçé yé, mais KODOFIL gain grand n’influens ôssit: fournir le materiyèl, standardizer progràm immersion, travayer pou la kréasyon un Baccalauréat Scyens en Instruksyon Immersyon, et fournir mèt et métrès d’ékol pou progràm-yé.

Chak progràm gain n’assosiasyon des paren ké responsab pou lever des fon ossi byen-k dòt projé ki soutchyen langaj françé dan la komunôté. Pren le Grand Pique-Nique, par ekzemp, ç’apé réuni tou yé progràm immersyon chak année en septemb pou ann journée bon tem et bon manjé.

Konsorsyum KODOFIL Progràm Immersyon Françèz la Lwizyàn

Konsorsyum Progràm Immersyon Françèz-là té kréé pou ann sours financyèr pou les paren, mèt d’ékol et administratèr impliké dan program-là-yé. Konsorsyum-ça, li rencont dé fwa par année pou partajer informasyon, identifyer problèm et discuter projé-yé. Konsorsyum, li parl pou problèm uniformité progràm et objèktif. Un objèktif principal Konsorsyum, c’est pou chercher des bours et dòt sours finansyèr. En 2001-2002 té gain des bours et liv di gouvernemen françé, komunôté françèz de Bèljik, Québec, Klub Lions de Frans, Confédération des Associations des Familles Acadiennes, et de Frans-Lwizyàn.

Rekrutmen Mèt d’Ékol KODOFIL

Cliké icit pour informasyon su konmen dèt mèt d’ékol KODOFIL !

Y n’a tèlmen moun ap’olé ensenyer en Lwizyàn ke nous-zòt gain pou dépend finansyèrmen su dòt gouvernemen pou l’assistans. Pendan l’année skolair 2001-2002, 210 mèt d’ékol sorti la Frans, Bèljik, Kanadá, et Afrik tap’ensenyé le françé endan lé-z’ékol en Lwizyàn. Yé tous byen kalifyé et mais y’ap travayé pou donner l’occasion à la Lwizyàn pou pli bezwin mèt d’ékol dòt plas.

Konsorsyum KODOFIL Université et Collèj

Konsorsyum KODOFIL université et collèj réuni reprézentan départemen françé de tout lé-z’université. Konsorsyum-là té kréé pou donner konsey au Konsey KODOFIL su kestyon su l’ensenyemen di françé en Lwizyàn et pou administrer progràm Bours KODOFIL. Pendant l’année 2000, Konsorsyum-ça té kréé progràm échanj avèk Classiques Pélican, projé à Pelican Publishing pou publier litératchur la Lwizyàn au 19èm syèk, et avèk MICÉFA, un konsorsyum Paris université, pou offrir progràm échanj mwen chèr à Paris à yé z’étidyan sorti la Lwizyàn. Premyé liv publié dan Classiques Pélican sorti en 2001, li pélé Tante Cydette. Pou 2002, Konsorsyum té travayé pou progràm ti bours pou z’étidyan et professèr à l’université k’apé fé recherch su litératchur et linguistik la Lwizyàn.

Institusyon memb Konsorsyum :

Centenary College, Delgado Community College , Dillard University, Grambling State, Louisiana State University à Alexandrie, Louisiana State University at Baton Rouge , Louisiana State University at Eunice , Louisiana State University, Shreveport , Louisiana Tech, Loyola University , McNeese State University, Nicholls State University , Northwestern State University, Our Lady of Holy Cross College, Southeastern Louisiana University, Southern University, Southern University at New Orleans, Tulane University, University of Louisiana at Lafayette, University of Louisiana at Monroe, University of New Orleans, et Xavier University.

Progràm Bours Pou Étidyer

Kliké ici pou dòt z’informasyon su Progràm Bours KODOFIL.

Progràm bours té kréé pou donner la chans à z’étidyan et mèt la Lwizyàn kourri étidyer dan z’ann plas àoù yé kapab viv en françé. Mèsi byen à nous-zòt partenair étranjé et surtou Komunôté françèz de Bèljik, la Frans, Kanadá, z’université dan Québec et Nouvèl-Ékos. Nou kapab offrir à pè prè 2500 bours pou étidyer dan péyi zòt. Fondasyon KODOFIL gain yé bours Domengeaux pou étidyer pendan ann année endan la Frans ou la Bèljik et objèktif-yé, c’est pou offrir enkò dòt bours et dan dòt plas. Konsorsyum KODOFIL Université et Kollèj la Lwizyàn sinyé dé-z’akòr avèk MICÉFA (Missyon Interuniversitair pou la Koòdinasyon Échanj Franko-Amérikain), ké un konsorsyum université à Paris, k’apé offer un semest ou ann année à Paris pou mwen chèr à z’étidyan sorti la Lwizyàn.